وانا ماشي في وسط البلد بحب جدا اتأمل في جمال عمارات القاهرة الخديوية أكيد زي كتير من الناس وخاصة بعد اهتمام الدولة بإظهار الجمال دا بتطوير المنطقة الخديوية فن وجمال في ادق ادق التفاصيل ساهم العامل المصري بحرفيتة مع الفنان الاوروبي في اظهار جمال فن العمارة ، لحد ما يقطع نظري مبنى مصمت إسمنتي قبيح مفيهوش اي نوع من الجمال ولا الفن مجرد مبنى قائم بيرجع للحقبة الناصرية الي اعتمدت في فن عمارتها على عمارة الاتحاد السوفيتي بدون اي فن او جمال ، ويصدمك العشوئيات القريبة من التحف المعمارية دي . ..
فجة في بالي سؤال هل الفن عامة والمعماري بالأخص مرتبط بأخلاق المجتمع ؟ بمعنى اخر هل الفن عامة والفن خاصة في العمارات دي بيعكس أخلاق الناس في الوقت دا ؟
- فعلا في فلاسفة كتييير اتكلموا ف الموضوع دا وفي منهم ربط الفن بالاخلاق وإن الفن لم يكن الا بوجود الاخلاق والاخلاق لا توجد الا بوجود الفن بأعتبار ان الاتنين مرتبطين بالحس لأن الشكل بطبيعتة مُحرك للروح والروح ضابطة للنفس اساس الأخلاق ،، وبالتالي فالعلاقة بين الفن والاخلاق علاقة طردية كلما ارتفع الفن في المجتمع ارتفعت الاخلاق معاها وبالعكس كلما هبط الفن هبطت الاخلاق معاها.
لكن اية علاقة فن العمارة بالاخلاق ؟؟
العمارة بصفة خاصة والاخلاق مرتبطين بالإنشاء الاتنين بينشئوا مع اختلاف الشئ ذاتة العمارة تنشئ مباني والأخلاق بتنشئ إنسان وبالتالي فأي مبنى ممكن نترجمة الي أخلاق خاصة أن كتير من مباني اليوم لم تبنى عشان تعبر عن القيم المجتمعية لكنها بنيت على أسس فردية فيها كتير من الأنانية وعدم الاهتمام بالآخر .
لكن ازاي ممكن نترجم فن العمارة كنتيجة لأخلاق المجتمع يعني ازاي النظام الأخلاقي بينعكس على العمارة ؟؟
فلو كان التخطيط للمدينة من الاساس بيراعي مساحات الطرق والاحتياجات المستقبلية التوسعية وان الكل يقدر يشوف الشمس ويشم الهوا المنعش وتوافر المدارس والمستشفيات وغيرها من الخدمات الأساسية فدا يعني ان القائمين علي العمل المعماري دا راعوا احتياجات الأخرين مش بس في عصرهم لا وكمان الاجيال القادمة فدا طبعا من أخلاق مراعاة الاخرين ، قوة البناء من حيث تحملة لظروف الزمن والعوامل الطبيعية مش زي العمارات الي بتقع فدا بيدل علي خُلق الأمانة للقائمين علي البناء ، دا حتى الزخرفة والتماثيل وأنهم يدوا ادق ادق التفاصيل مجهود كبير فدا بيدل علي خُلق الاتقان في العمل ... وهكذا
في النهاية عشان دوشتكم بص للصور التلاتة وحدة للقاهرة الخديوية، وحدة للقاهرة الناصرية، والاخيرة للقاهرة العشوائية
وانتا هتعرف اية العصر الي كان فية أخلاق .
